Kryetari i Partisë Demokratike, Sali Berisha, në një deklaratë për mediat u ndal te organizimi i PD-së me nisjen e sesionit të ri parlamentar.
I pyetur për rolin e Gazment Bardhit si kryetar i Grupit Parlamentar të PD-së, Berisha nuk dha një përgjigje të prerë, por vlerësoi angazhimin e tij në këtë detyrë.
“Unë nuk po prononcohem, por kam një vlerësim pozitiv për punën e tij. Funksioni do të përcaktohet në mënyrë demokratike. Gazment Bardhi e ka ushtruar me dinjitet këtë rol, por vendimin për kryetarin e grupit do ta marrë vetë grupi,” tha ai.
Ndërsa për mundësinë që të hapë seancën plenare të 10 shtatorit, si deputeti më i vjetër në Kuvend, Berisha u shpreh kategorik se nuk do ta bëjë.
“Një parlament jolegjitim nuk mund ta hap kurrë. Nuk mund t’i bëj vendit tim një antishërbim të tillë. Po të ishte legjitim, me kënaqësi do ta bëja. Por ky nuk përfaqëson vullnetin e qytetarëve shqiptarë, sipas dokumenteve kombëtare dhe ndërkombëtare. Edhe rekomandimi i Këshillit të Evropës e thotë qartë: në Shqipëri duhet të ndahet partia nga shteti. Si mund ta hap unë një parlament të tillë? Kurrë,” u shpreh Berisha.
